divendres, 22 d’agost de 2003

DISCORS D'ENRIC GARRIGA TRULLOLS A L'ESCÒLA OCCITANA ESTIU

Sénher amic president,
Occitans e catalans

Cars amics,

Ongan, un còp de mai, lo CAOC, en lo sieu XXV Aniversari, vos ofrís l'actuacion d'un grop catalan, que  vos farà dansar.

Espèri qu'aurem l'an que ven la possibilitat de contunhar la collaboracion del CAOC a la velhada catalano-occitana de l'EOE.

Disi aquò, perqué es de preveire que las circonstàncias politicas de Catalonha seràn fòrça diferentas de las actualas e lo CAOC fa qualques activitats en foncion de las subvencions que nos balha lo govèrn catalan.

De tot biais vos pòdi assegurar que la preséncia catalana a l'EOE contunharà.

Ongan es lo XXVen aniversari del CAOC Comitat d'Afrairament Occitanò-catalan e avèm fait  e fasèm totjorn sonque activitats de relacions occitanò-catalanas.

Avèm fait e fasèm actes per tota Occitània, tre las valadas occitanas d'Italia duscas la Val d'Aran.

Avèm presentat Occitània per totes los Païses Catalans, Principat de Catalonha, Baleares, País Valencian, Catalonha del Nòrd, l'Alguer, Franja de Ponent d'Aragon e Andòrra.

Una pichòta mòstra de çò qu'avèm fait ongan la podètz veire sul panèl plaçat a l'estanquet de l'Escòla d'Estiu.

Per acabar vos disi que lo grop catalan, qu'ara participarà a la velhada, ven de Manresa, qu'es la ciutat capitala de la comarca del Bages, e lo grop se sòna ENRENÒU FOLK. Enrenòu en catalan vòl dire bruch, tarabastal. Son nòu musicians que venon de diferents airals : tradicional, classic e modèrn.

Aquò fa que son repertòri es mai contemporanèu.

Per aquò dison que fan musica fresca per dansar e amusar.

Ara es a vosautres de far lo jutjament e la valoracion.

Grands mercés a totes e a l'an que ven.

Visca Occitània
Visca Catalonha

diumenge, 3 d’agost de 2003

DISCURS D’ENRIC GARRIGA TRULLOLS AL PÒRT DE SALAU

Amics occitans
Amics catalans

Som arribats un altre cop al Pòrt de Salau.

Amb aquesta ja son setze cops que hem pujat per abraçar-nos occitans i catalans en aquesta festa de l’amistat entre els dos pobles, per reivindicar la cultura comuna i les nostres llengües bessones en perill. La solidaritat dels catalans als occitans manifestada a través dels segles vull expressar-la, un cop més, parlant en occità.

Amics occitans,
Se fasèm la remembrança de las illusions que los catalans e occitans avèm exprimit aicí, en lo punt mai naut de la nòstra montanha comuna, sus la novèla Euròpa que se fargava, e se fasèm la comparacion amb la dura realitat actuala, vesèm que la nòstra illusion comuna que nos plaçava al primièr luòc dels mai eurooptimistes s’atudat e ara sèm los primièrs eurocritics.

Fa fòrça temps qu’avèm somiat que los estats serián superats e que l’Europa fariá reconeissença de las realitats coma la catalana e l’occitana.

Mas la realitat es que la novèla Europa blinda e conserva las ancianas frontièras dels estats e los jacobinistes franceses e espanhòls nos an ganhat la batalha un autre còp.

La novèla Constitucion d’Europa a eliminat la paraula pòbles e a daissat sonque Estats e ciutadans. An refusat de crear l’estatut de regions associadas o de regions especialas o constitucionalas.

An refusat que lo catalan e l’occitan siagan presents en la novèla Euròpa amb las 25 lengas que seran oficialas .

An refusat que las regions e las nacions sens estat poscan participar en la politica comunitària.

Lo projecte d’aquesta constitucion es mai qu’una declaracion de principes, es una declaracion de guerra contra las doas nacions Occitània e Catalonha, las mai grandas d’Euròpa sens estat pròpi.

Avèm de prendre exemple dels nòstres enemics jacobins que s’unisson per nos acabar d’escanar.

Tanben nosautres catalans e occitans nos cal amassar e unir perqué ara lo perilh es mai grand.

Mas aquò nos farà pas perdre la fe e l’esperança e tanpauc daissarem de luchar per las nòstras libertats e per las nòstras lengas e cultura.

E quan nos demandaran de votar la Constitucion Europea direm NON, perquè volèm pas èstre complices dels nòstres enemics jacobins.

Volèm l’Euròpa dels pòbles. Volèm l’Euròpa federal. Volèm d’Euròpa de totas las lengas. Volèm l’Euròpa de la justícia igual per totes. Volèm una Euròpa sens frontièras. Volèm cambiar e modificar las frontièras internas e externas dels estats.

Volèm la libertat!.

Ongan, aquest es lo crit de Salau. Libertat!. Aicí sèm en la repùblica catalana-occitana de Salau ont las bandièras son las nòstras e las lengas son lo catalan e l’occitan.

E l’an venent tornarem amb mai de vam e de fòrça

E ara la festa, que la frairetat comença.

Visca Occitània.
Visca Catalunha.

Enric Garriga Trullols
President CAOC

Salau 3 d’agost 2003