dissabte, 16 de desembre del 2006

DISCORS ENRIC GARRIGA TRULLOLS INAUGURACION DE LA PLACA DE REMEMBRANÇA DE PÈIRE VILAR A FRONTINHAN

Sènher Pierre Bouldaire, alcalde de la vila de Frontinhan
Sènher Ives Jaumain, conseller de la vila de Frontinhan,
Sra. Rosa Congost, de la Facultat de Lletres de la Universitat de Girona,
Sr. Jaume Sobrequés, Director del Museu d’Història de Catalunya,
Sr. Jean Vilar, filh de Pèire Vilar,
Sr. Pèire Pessamessa, president del CAOC occitan,
Mn. Josep Cardús, vice-president del CAOC catalan,
Jordi Peladan, vice-president del CAOC occitan,
Sabina Koloskoff, presidenta del Cercle Occitan a Frontinhan
Amics occitans,
Amics catalans,

Sèm aicí per manifestar e mostrar la nostra reconeissença cap a una granda personalitat que nos a daissat un gran trabalh de recerca sus l’istòria moderna de Catalonha e tanben sus la istòria d’Espanha.

Aquò que coneissem totes los catalans es pas evident pels occitans, mens encara pels franceses e tanpauc pels estatjants de Frontinhan.

Per aquesta rason cal felicitar la comuna de Frontinhan per l’organizacion dels actes de uèi per divulgar la granda personalitat d’un filh d’aquesta vila que nasquèt en 1906.

Coma grand istorian merita aquest omenatge, mas en relacion a la nòstra Associacion lo “Cercle d’Agermanament Occitano-Català” tanben merita un omenatge, car foguèt lo primièr president de la Seccion occitana del CAOC pendent 3 annadas del 24/6/78 al 14/2/81.

Cal ajustar que Pèire Vilar foguèt elegit President del CAOC a Montpelhièr per la Festa de Sant Joan del 1978. Foguèt la consolidacion del CAOC. Pendent tres jornadas se fagueron unes collòquis sota la presidéncia de Pèire Vilar. Totes los actes se fagueron dedins l’Ostal de la Comuna amb un fum de monde. A l’exterior, a la Plaça de l’Òu, i aguèt sardanas.

Pèire Vilar tanben faguèt una conferéncia magistrala sus l’istòria de Catalonha en catalan. Diguèt que mestrejava melhor lo catalan que sa lenga mairala l’occitan.

Aquesta conferéncia foguèt editada en 1978 per l’Institut d’Estudis Occitans e lo CAOC vos l’ofrís ara recuperada de l’oblit.

Evidentament ieu ai conegut Pèire Vilar perque soi un dels fondators del CAOC, manteneire permanent e assistent a totes los actes. Èra un ome amable, discret, tranquil e savi. Era un grand sabent de la nòstra istòria catalana. En totes los encontres totjorn me parlava en catalan. En defòra del CAOC totjorn l’ai vist al costat de son amic catalan Max Cahner.

Es lo meteis Pèire Vilar qu’a racontat fòrça còps qu’èra escolan a Montpelhièr e demorava a l’ostal de las seunas tantas e que totjorn parlava sonque en occitan.

Per la partida catalana del CAOC èra president Josep Maria Batista i Roca. I aviá, doncas, dos grands presidents catalanistas en caduna de las doas seccions o partidas del CAOC.

Simbolicament es interessanta aquesta coïncidéncia, mas tanben podèm afirmar que Batista i Roca foguèt un grand occitanista catalan.

D’autra part tanben es simbolic que l’acte fundacional del CAOC se faguesse en Montpelhièr qu’èra tanben lo país natal de Pèire Vilar, e tanben lo país natal del grand rei catalan Jaume I, nascut en 1208.

Lo paire del rei Jaume I èra Pere el Catolic que moriguèt a Muret per defendre Occitània de la invasion francesa, apelada Crosada, que menava Simon de Monfort.

L’an 2008 serà, doncas, lo 800 anniversari de la naissença de Jaume I a Montpelhièr en 1208 e tanben lo 30 anniversari de la naissença del CAOC a Montpelhièr en 1978 sus la presidència de Pèire Vilar.

Serà una dobla commemoracion e serà una capitada se avèm la collaboracion de las comunas, de la region, dels conselhs generals, e principalament de las associacions occitanas e catalanas.

Per la part catalana tanben la Generalitat e las universitats.

I ara per acabar citi una frasa de Pèire Vilar, del setembre 1989, que m’a mandat lo monge de Montserrat, l’istorian Hilari Raguer, que s’a desencusat de poder pas assistir. Ditz la frasa: “Retinguem que la història és feta d’allò que uns voldrien oblidar i d’allò que uns altres no poden oblidar. És tasca de l’historiador esbrinar el perquè d’una cosa i de l’altra”.

Pèire Vilar a demostrat que Catalonha foguèt e es encara una nacion. Coma istorian, lo melhor istorian de l’istòria catalana moderna, aquesta definicion nacional de Catalonha es lo mai preciós legat que nos a daissat als catalans un occitan de Frontinhan.


Grand-mercés a Pèire Vilar
Grand-mercés a vosautres que m’avètz escotat.


Enric Garriga Trullols
President del CAOC