diumenge, 22 de juny de 2003

XXV APLEC A MONTSEGUR. DISCORS D’ENRIC GARRIGA TRULLOLS A MONTFERRIÈR

Sénher Patric Pont, conse de Montferrièr,
Amics catalans e occitans,

En primièr, me cal regraciar, en nom del CAOC catalan e tanben del CAOC occitan, l’acuèlh frairal que nos balha ongan la comuna de Montferrièr per far la part mai complementària de la jornada d’uèi e que a l’encòp es tanben lo 25 aniversari del CAOC e lo 25 aniversari dels Fòcs de Sant Joan a Montsegur.

Ièu èri a Montsegur, lo 23 de junh de 1979, quand avèm alucat un petit fòc al Prat dels Cremats amb la Flama del Canigó, que los catalans anèron quèrre a Perpinhan.

Podiam pas imaginar que la fèsta del Fuòc de Sant Joan se fariá pendent 24 ans e qu’en arribar lo 25èn aniversari seriá suprimida e interdicha de far al Prat del Cremats.

Ièr avèm encontrat l’acuèlh a Vilanòva d’Olmes e uèi a Montferrièr, on la presència de la montanha de Montsegur tanben es evidenta e vesina.

Grands mercès amics, nos avètz ajudat a sauvar la festa de l’amistat occitanò-catalana.


Visca Occitània
Visca Catalonha

Enric Garriga Trullols
President del CAOC
Montferrier, 22 de juny de 2003 

dissabte, 21 de juny de 2003

XXV APLEC A MONTSEGUR. DISCORS D’ENRIC GARRIGA TRULLOLS

Sénher Felip Walter, conse de Montsegur
Sénher representant de la Generalitat de Catalonha
Amics catalans e occitans

Sèm amassats un còp de mai occitans e catalans a Montsegur. Mas aquesta amassada es fòrça importanta perque es a l’encòp lo XXVen Aniversari del CAOC e tanben lo XXVen Aniversari dels Fòcs de Sant Joan a Montsegur.

Aqueste gòt de l’amistat que nos ofris uèi la Comuna de Montsegur representa çò que lo CAOC a fargat a Montsegur, la prigonda amistat occitano-catalana.

Representa çò meteis qu’avèm fait ara a la glèisa de Montsegur, un acte que dempuèi 1978, fa 25 ans, fasèm los catalans e occitans cada còp que cantam la COPA SANTA, aquel imne de Frederic Mistral, que ditz “Catalans de luènh o fraires comuniem totis ensems “. Aquò passa en Provença e Occitània tota, mas principalament a Montsegur.

Representa çò meteis qu’avèm fait al Prat dels Cremats amb l’ofrenda florala als martirs catars. Es un acte de justícia e d’amor. Es un acte de frairetat.

Es çò meteis que representa aqueste arbre, plantat davant la comuna, pel CAOC, qu’èra inicialment un pi de doas brancas. Un meteis pòble amb doas lenguas bessonas.

Pel CAOC 25 ans representa tota una vida. Per Occitània representa la recuperacion de las relacions occitano-catalanas modèrnas dins un novèl estatut politic d’Euròpa.

Pòdi pas ara  remembrar tot cò qu’avèm fait, tot çò qu’avèm viscut, tot çò qu’avèm somiat pendent aquestes 25 ans .

Vòli sonque dire qu’aquesta es una escasença importanta que se deuriá celebrar coma cal e regreti que sèm lo pòble aquí, principalament, los que fasèm l’acte, amb l’abséncia de las nautas autoritats qu’avián promés la seuna assisténcia. Lo 21 de junh de 1979 lo pòble, sonque lo pòble èra present al Prat dels Cremats. Ara fasèm coma lo primièr còp. Es lo pòble que fa l’istòria e las dificultats nos faràn pas defalhir e continuarem la lucha per los dreits dels pòbles, per la patz, per la libertat e per l’amistat occitano-catalana.

Visca Occitània
Visca Catalonha.

Enric Garriga Trullols
President del CAOC
Montsegur 21 de juny 2003

dissabte, 7 de juny de 2003

DISCORS D’ENRIC GARRIGA TRULLOLS A MARSELHA

Amics occitans de Nimes e de Provença
Amics catalans de Marselha
Amics tots

En primièr vòli mercejar la coral acollença que nos fasètz e aquò es la mòstra mai evidenta de la tradicionala amistat entre Marselha e Barcelona, entre Catalonha e tota Occitània.

Dempuèi lo maridatge entre lo nòstre Ramon Berenguer III e la vòstra comtessa Dolça de Provença las relacions entre catalans e provençaus totjorn son estat cordialas, malgrat qualques moments de guerras o per conflictes politics.

Vòli pas oblidar que Provença e Catalonha an la meteissa bandièra.

Vòli pas oblidar las relacions frairalas entre la Renaissença provençalo-occitana e la Renaixença catalana, amb la prigonda amistat entre Frederic Mistral e lo Felibrige amb los catalans Víctor Balaguer e Mossèn Cinto Verdaguer, entre d’autres.

Tanben vòli remembrar l’aculhença frairala dels provençals, e occitans totes, dels exiliats catalans pendent la guerra civila espanhòla del 1939. D’aquest exili demòra lo Cercle Catalan, de Marselha, que ongan nos a preparat lo viatge tradicional de Pentacosta que fa cada an lo CAOC, amb l’ajuda de l’associacion MARPOC, de Nimes, que mena nòstre grand amic Jòrdi Peladan.

Lo Comitat d’Afrairament Occitano Catalan (CAOC) ongan celebra lo 25en Aniversari de la seuna fundacion, en genièr de 1978.

Son 25 ans de trabalh. Avèm fait un fum d’actes de tota mena, per ajudar la coneissença mutuala entre los dos pòbles e las seunas lengas e culturas, en mai de la nòstra istòria comuna.

Avèm capitat en çò qu’avèm fait, mas demòra de far una molonada de causas que dificilament pòt far una associacion coma la nòstra amb sas limitacions de tot ordre.

Mas lo grand problema que se pausa es que sèm la soleta associacion qu’existís en tota Occitania e en totes los Païses Catalans, dedicada exclusivament a las relacions culturalas entre los nòstres dos pòbles.

Sabi que los occitans e catalans avèm un sòmi, qu’es l’Union Europèa, mas malurosament, fins ara, es un afar dels estats. Avèm pas cap poder e tanpauc cap votz en la novèla Europa. Mas ara dintran, dins la Union Europea, detz estats novèls, e nòu son mai pichons que los Païses Catalans e tanben mai pichons que los Païses Occitans.

Bessai arribarà lo temps que las culturas sense estat seran reconegudas. Pr’aquò ara cal trabalhar amassa per la reconeissença dels nòstres dreits e tanben per afortir la nòstra amistat.

Amb aquesta fe, vos disi grands-mercès a totes, al reveire e
Visca Provença,
Visca Occitania,
Visca Catalonha.

Enric Garriga Trullols
President del CAOC