dimarts, 10 de febrer del 2009

DISCURS D’ENRIC GARRIGA PRESENTACIÓ D’ARPITÀNIA AL CAOC

Cars amics arpitans
Cars amics catalans,

Ai causit de vos parlar un pauc en occitan perqué cresi que l’occitan fa de pont entre la lenga catalana e la lenga arpitana.

Cresi que uèi es una jornada importanta pels catalans perque jamai soi conscient d’aver entendut ni tanpauc legit que se faguèsse jamai un encontre catalano-arpitan. Es un grand eveniment aver causit aqueste primièr encontre, mas tanben és un eveniment màger reçaupre en Barcelona e al CAOC l’Aliança Culturala Arpitana tan representativa e tan significativament militanta per la vòstra lenga e cultura.

Coneissi las principalas ciutats d’Arpitània, la Savoia, lo Lionès, la Val d’Aosta e la partida arpitana de Suïssa a l’entorn de Ginèbra e son lac Leman e sustot las grandas montanhas alpinas e la jòia del preciós e remirable lac d’Anencí.

Mas confessi la meuna ignorància perqué jamai en aquestes viatges ai poscut escotar la vòstra lenga. E aquò se passa tanben atal en Occitània se coneisses pas personas sul terren que te podon aculhir e parlar la lenga occitana. Mancava, doncas, conèisser personas militantas e ara las causas seran mai simples, sèm coneguts e l’orizon serà mai larg, las aurelhas mai atentivas e l’interès creisserà fórça per nos coneisser e per nos ajudar mutualament.

Vos balhi la benvenguda mai corala en Catalonha, desiri que aqueste primièr contacte siaga seguit de fòrça d’autres e que la recuperacion de las nòstras lengas siaga tanben la recuperacion de las culturas dels nòstres dos pòbles dins una Euròpa ont totes los pòbles siagan reconeguts coma nacions e sas lengas coma patrimòni europenc e universal, que cal conservar, protegir e recuperar en la seuna integritat e valor.

Visca Arpitània,
Visca Catalonha,
Visca l’Aliança Cultura Arpitana,
Visca los Amics d’Arpitània