divendres, 18 d’agost de 2006

DISCORS D´ENRIC GARRIGA TRULLOLS A LA XXXII ESCOLA OCCITANA D’ESTIU

Sénher Vicepresident de l’Escòla Occitana d’Estiu,

Cars amics occitans e catalans,

Un còp de mai lo CAOC, lo Cercle d’Agermanament Occitano-catalan, vos presenta un novèl grope de musica e cançon catalana diferent dels autres gropes abans presentats en edicions anterioras, mas tanben es fòrça diferent per son estil de totes los autres catalans qu’an actuat a l’EOE.

Pensi que vos agradarà perqué ieu, que los ai ausit en doas ocasions, tanben m’an agradat.

Un còp vengueron un grop d’occitans d’Ardecha a Catalonha e de los ausir cantar se son regalats.

L’Escòla Occitana d’Estiu es un luòc d’amistat, mas l’umor i es tanben present. Cantalausa en son diccionari ditz qu’aver d’umor es una qualitat de las bravas.

Qualitat e umorisme vaquí la formula del concert que lo CAOC vos prepausa uèi.

Mas abans de començar lo concert del grop catalan vos disi que Catalonha a aprovat en referendum un novèl Estatut d’Autonomia que dempuèi lo 9 d’agost 2006, lo dimècres de la setmana passada, es en vigor. Es pas sufisent pels catalans, mas es bon pels occitans.

A l’article 6 apartat 5 se declara la lenga occitana oficiala en tota Catalonha, en mai de la Val d’Aran.

Aquò es una avançada importanta per l’occitan que vos pòt ajudar tre l’exterior.

Ara çò que cal es ensenhar l’occitan als catalans.

Prepausi als professors d’occitan de venir en vacanças a Barcelona e organizarem corses cortets d'una o doas setmanas pendent las diferentes vacanças del cors escolar.

Oblidatz pas aquò e cal contactar lo CAOC amb fòrça avança per preparar los corses. Lo CAOC pagarà los fraises e l’albergament.

E ara la musica catalana serà amb vosautres.

Visca Occitània,

Visca Catalonha!!


Enric Garriga Trullols
President del CAOC

Vilanòva d’Olt
18-08-2006

Cap comentari:

Publica un comentari a l'entrada