dijous, 6 de gener de 2011

MISSATGE DE FÈLIÇ DAVAL D'ORLHAC

De: Félix DAVAL
Enviado el: Jueves, 06 de Enero de 2011 8:14
Para: Enric GARRIGA
Asunto: Prats de Rei
Als amics catalans

L'associacion Carladés, la Calandreta del Vernhat e la seccion cantalesa de l'Institut d'Estudis Occitans son presents per la pensada uèi als Prats de Rei e an l'onor d' i èsser representats pel carladesenc lo mai celèbre, lo mai conegut ; lo compositor, lo musician lo mai prestigiós : Monsenhor Valentin Miserachs.

Monsenhor Valentin Miserachs es a l'encòp catalan e occitan, que sos aujòls son de nòstra pichona « comarca » istorica del Carladés ; oblidam pas tot çò qu'amb Mossèn Josep Ruaix e l'associacion de « Els Amics del Carladès a Catalunya » a fach per nosautres, particularament per las escòlas ont la lenga nòstra èra ensenhada e per la calandreta del Vernhat.

Oblidam pas tanpauc los nombrosas visitas que lo president Enric Garriga Trullols, la Teresa Clota e los amics del CAOC an fachas dins lo Cantal, lor ajuda a la calandreta d'Orlhac e a fòrça associacions occitanas.

Los catalans an quasi totjorn ajudat los occitans, citarem sonca quauques exemples. Gerbèrt estudièt a Vic, Barcelona, Ripoll. Fòrça trobadors nòstres seguèron aculhits a la cort dels reis d'Aragon.  Entre los sègles XV e XVIII de nombroses occitans plan paures quitèron lor país per anar viure en Catalonha. En 1935 Joaquim Cases-Carbo permetèt al Lingüista  Alibert de publicar la gramatica occitana, un document capital  per  escriure la Lenga Nòstra. ..

Venètz de votar una lèi que fa de l'occitan una lenga oficiala sus tot lo territòri de Catalunya, aquò's un present plan bèl, plan grand per Occitània, un reconfòrt de saber que i a un país ont la Lenga Nòstra es reconeguda, protegida, considerada, respectada ...subretot per nosautres paures cantaleses que dins nòstras escòlas suprimisson son ensenhament.

Mas uèi nos cal pas plorar, als Prats de Rei las tropas de Felip V seguèron vencidas ; aquesta fèsta occitana dins la vòstra ciutat, testimoniatge de solidaritat cada an renovelat dempuèi 2007, nos pòrta l'èsper e a nosautres que sèm lasses de nos batre nos dòna de vam per contunhar de luchar. Sabèm que sèm pas sols, qu'un jorn los jacobins tiraràn en arrièr.

Mercé a vosautres qu'avètz organizada aquesta manifestacion, mercé a vosautres que sètz venguts a aquesta granda fèsta per la lenga occitana.

Visca Occitània !Visca Catalunya !

Fèliç Daval

Cap comentari:

Publica un comentari a l'entrada