dissabte, 4 d’octubre de 2008

140 ANIVERSARI DE LA VINGUDA DE FREDERIC MISTRAL DISCURS A LA GENERALITAT

Sr. President de l’Institució de les Lletres Catalanes,
Sénher Capolièr del Felibrige,
Majorals del Felibrige,
Felibres,
Occitans,
Catalans,

Un còp de mai la Generalitat de Catalonha recep lo Felibrige per festejar e remembrar un eveniment màger, la venguda de Frederic Mistral a Barcelona. En 1868 tota Catalonha recebèt triomfalament Mistral e los felibres.

Vòli remembrar tanben que i a un autre aniversari a festejar ongan, lo 75 aniversari del Centenari de la Renaissença Catalana, que foguèt celebrat lo mes d’abril de 1933. Venguèron nombroses los occitans invitats e en aquesta meteissa sala fogueron recebuts 180 provençaus, ambe lo capolièr, pel president de la Generalitat Francesc Macià, lo 15 d’abril de 1933. Aprèp foguèron festejats a Ripoll e Tarragona.

Francesc Macià foguèt lo primièr president de la Generalitat restablida. Encara es lo president mai aimat pel pòble catalan. Francesc Macià èra sòci del Felibrige dempuèi 1927. A Montpelhièr lo Consistòri del Felibrige li balhèt aquest títol. La proposicion èra de Pèire Azemà.

Tanben Francesc Macià balhèt subvencions a l’Oficina de Relacions Meridionalas en 1931.

Lo 9 junh 1987, 360 felibres tanben foguèron recebuts en aquesta sala del Salon de Sant Jòrdi.

Tanben mai recentment, lo 9 d’octubre 2004, foguèron recebuts los provençaus aicí ambe lo grop de la Soca Tarasconenca en l’escasença de las festes mistralenques del 150 Aniversari del Felibrige organizadas pel CAOC. En representacion del capolièr Pèire Fabre i participèt Jaume Mouttet, Majoral Baile del Felibrige e actualament Capolièr, aicí present.

Ambe aquestes actes, totes amassa fasèm istòria e la Generalitat cada còp serà mai activa per promòure las relacions entre Occitània e Catalonha.

Grands mercès a la Generalitat per son ajuda, grands mercès al Felibrige per la vòstra venguda, pel vòstre vam e pel vòstre estrambòrd. E per la vòstra amistat.

Visca Catalonha!
Visca Occitania!
Enric Garriga Trullols
President del CAOC

Cap comentari:

Publica un comentari a l'entrada